နွားထိုးကြီး ဧပြီ ၁၂
ကိုရိုနာဗိုင်းရပ်စ်ရောဂါ ကုသရေး၊ တိုက်ဖျက်ရေးနှင့် ထိန်းချုပ်ရေးလုပ်ငန်းများကို ရှေ့တန်းမှ သက်စွန့်ဆံဖျား အပင်အပန်းခံ ကြိုးပမ်းနေကြသည့် ဆရာဝန်များ၊ သူနာပြုများနှင့် ကျန်းမာရေးဝန်ထမ်းများ အသုံးပြုနိုင်ရန်အတွက် နှာခေါင်းစည်း (Face Mask) များနှင့် ရောဂါကာကွယ်ရေးဝတ်စုံဖြစ်သည့် PPE (Personal Protective Equipment) များကို တိုင်းဒေသကြီးနှင့် ပြည်နယ်များရှိ ပြည်သူ့ဆေးရုံများ၊ မြို့နယ်ဆေးရုံများနှင့် တိုက်နယ်ဆေးရုံများသို့ ပြည်ထောင်စုကောင်းကျိုးဆောင်ပါတီက ဖြန့်ချီလှူဒါန်းလျှက်ရှိသည်။
ထိုသို့လှူဒါန်းမှုအစီအစဉ်၏ (၁၀)ရက်မြောက်နေ့အဖြစ် ယနေ့ ၂၀၂၀ ပြည့်နှစ်၊ ဧပြီလ ၁၂ ရက်နေ့တွင် မန္တလေးတိုင်းဒေသကြီး၊ နွားထိုးကြီးမြို့နယ်အတွင်းရှိ နွားထိုးကြီးပြည်သူ့ဆေးရုံ၊ တံစိုးတိုက်နယ်ဆေးရုံ၊ ကန်နားတိုက်နယ်ဆေးရုံ၊ ဝက်လူးတိုက်နယ်ဆေးရုံ၊ အောင်ပန်းကုန်းကျေးလက်ကျန်းမာရေးဌာန၊ ပင်စည်ကျေးလက်ကျန်းမာရေးဌာန၊ လက်ဝဲမြင်းနီကျေးလက်ကျန်းမာရေးဌာနနှင့် နနွင်းတော်ဘိုးကျေးလက်ကျန်းမာရေးဌာနတို့တွင် အသုံးပြုရန်အတွက် နာခေါင်းစည်း (Face Mask) နှင့် PPE များကို ပါတီတာဝန်ခံများက ဆေးရုံအရောက် သွားရောက်လှူဒါန်းကြသည်။
ထိုသို့လှူဒါန်းရာတွင် ဆေးရုံမှ တာဝန်ရှိသူ ဆရာဝန်များ၊ ဆရာမများ၊ သူနာပြုများနှင့် ကျန်းမာရေးဝန်ထမ်းများက ဝမ်းမြောက်ဝမ်းသာ လက်ခံရယူခဲ့ကြကြောင်း သတင်းရရှိသည်။
